Маладзечна на старых фотаздымках

30/11/201914/05/2022 Уладзімір Садоўскі

З моманту ад напісання артыкула пра абласны цэнтр Маладзечна з параўнаннем фотак 1950-х з сучаснымі ўдалося мне назбіраць яшчэ крыху старых фота горада, якія быццам бы не былі засвечаныя на сайтах і пабліках пра Маладзечна ў соцсетках (а калі і былі, то ў дрэннай якасці).

Новапабудаваны раён Гелянова на фота сярэдзіны 1950-х — хутчэй за ўсё, фота зроблена з былога афіцэрскага дома, які захаваўся ад часоў польскага вайсковага гарнізона. Падрабязней пра гэтыя кварталы тыповай забудовы я пісаў тут — Раён Гелянова: забудова 1950-х.

Былы абкам кампартыі і дом прафсаюзаў (цяпер музычная школа) на фота сярэдзіны 1950-х. Універмаг яшчэ не пабудаваны.

Абласная (цяпер раённая) дзіцячая бальніца, сярэдзіна 1950-х.

Помнік Леніну ў тыя гады, пэўна, быў самым фатаграфаваным аб'ектам у горадзе :) — Помнік Леніну ў тыя гады, пэўна, быў самым фатаграфаваным аб’ектам у горадзе 🙂

Вуліца Машэрава ў раёне Гелянова з пабудаванымі пасля вайны дамамі

Вуліца Таўлая. На пярэднім плане бачнае крыло будынка былога староства, пабудаванага ў 1927 годзе, далей па вуліцы знаходзіцца жылы дом, узведзены ў 1920-я паводле праекта Юліяна Лісецкага — пра гэтыя два аб’екты я пісаў у артыкуле «Польскае ведамаснае жыллё ў Маладзечна».

Рэстаран "Папараць кветка" — Рэстаран «Папараць кветка»

Від на гэты ж рэстаран з боку сквера каля кінатэатра "Радзіма" — Від на гэты ж рэстаран з боку сквера каля кінатэатра «Радзіма»

Былы праспект Леніна цяпер вуліца Вялікі Гасцінец у раёне Цэнтральнай плошчы, канец 1960-х — Былы праспект Леніна (цяпер вуліца Вялікі Гасцінец) у раёне Цэнтральнай плошчы, канец 1960-х

Завод «Электрамодуль» пасля адкрыцця, цяпер на гэтых плошчах размяшчаецца гандлёвы цэнтр

Забудова вуліцы Касманаўтаў, канец 1960-х

1980-я, аўтамабільная стаянка з відам на вуліцу Міра

1980-я, пабудова гасцініцы "Маладзечна" — 1980-я, пабудова гасцініцы «Маладзечна»

Некалькі даваенных фотак.

Плошча Старое месца ў базарны дзень, 1930-я

Капліца ў памяць аб ахвярах вялікага пажару ў Маладзечне ў 1874 годзе (мяркую, яна захавалася і знаходзіцца на вуліцы Вялікасельскай)

Праваслаўная капліца Аляксандра Неўскага, што стаяла на вуліцы Віленскай і, як пісаў краязнаўца Кастусь Шыталь ksz90, была ўзарвана ў ноч з 17 на 18 жніўня 1938 года радыкальна настроеным каталіцкім святаром Міхаілам Завадскім, які быў капеланам вайсковага гарнізона 86-га пяхотнага палка Войска Польскага ў Гелянова